السلام عليكم ورحمة الله وبركاته
كما وعدناكم بأستضافة الشاعر / محمد خلف الخالدي
نستضيف بهذا الصفحه الشاعر / محمد خلف الخالدي ونرحب به اجمل ترحيب
بمنتديات مملكة الزين
ونشكره على
تلبية الدعوة والحضور رغم مشاغله واعطائنا من وقته
ليكون معنا بهذا الحوار
حياك الله ابو ناصر:
الله يحييك اخي منادي
اتشرف بأن اكون ضيف خفيف على احدى صفحات
منتديات مملكة الزين
واشكركم على هذا الترحيب ولعلي اقدم مايرضي الجميع0
البطاقه
الأسم: محمد خلف محمد الخالدي
العمر46 سنه
المهنه: الامن العام
الهوايه: الشعر بجميع المجالات
س/كنت من شعار المحاورة وتوقفت عن المحاوره ماهو السبب؟
ج/السبب يعود لأنشغالي وعدم تفرغي0
س/ اين الشاعر محمد خلف من الاعلام؟
ج/ الاعلام مثل الصديق الذي اواجهه با المناسبات فقط
والتقي به لكن لم اذهب إليه
س/ من هم شعار المحاوره الذين اجتمعت معهم وتحاورت معهم؟
ج/كثيرووون لااستطيع احصيهم ولكن منهم الشاعر الكبير مستور العصيمي والشاعر الكبير رشيد الزلامي والشاعرالكبير عوض الله السلمي(ابو مشعاب) والكثير
س/بودنا سماع قصيده ونعود؟
ج/إليكم هذه القصيده والقصيد كثير واحتار بما انتقي منه

عجزنا نهوم الصبر لاشك مانقوى=وصلنا لبابه وانقفل دوننابابه
كل ذنوبنا من قل الايمان والتقوى=لعبنا ودنيانا با الاجواد لعابه
وانا خابر اني ما اخلف الظن والهقوى= على اللي ليامنا هقينا هقينابه
قصيدٍ تجود به المشاعر عليه اقوى= عليه انشدوني ناس عانو من اسبابه
يقولون شاعر ورث والا معك سقوى= سمعنا كلام من سمع به تغنابه
وانا اقول ورث مشقي ضامري شقوى=وردت القصيد ولا معي ما تعشابه
شماال وجنوب وسندوغرب واشرقوى=عرب شاقهم طرق لعبته وانا ادرابه
نقيت الكلام اللي على ضامري نقوى=بدت في صدور تلتهب وابتدينابه

س/مارأيك بمنتديات مملكة الزين بصراحة؟
ج/منتديات جميله ونظرتي لها للتقدم مماشاهدته
س/اعطنا عما شاهدته بملكة الزين؟
ج/ انا تصفحت همس القوافي واعجبني بما فيه من قصيد ووجدت هنا شعراء مبدعين ولفت نظري
الشاعر برق الوسم با الدرجة الأولى صراحة تابعت قصائده واعجبت بأسلوبه وشاعريته القويه ولا اتناسى
المبدعين الآخرين شعاربحقيقه وهناك مشاركات نسائيه جميلة
س/ قصيدة لم تكتمل حتى الان؟

الكلام اللي على خاطري طلة ندى=يعتبر صوغة عزيز تقبلها عزيز
والله اني من عنى الوقت ماعندي مدى=ضيقة بي سود الايام ياعبدالعزيز
يوم اشوفك سكر الدم يركد ويهدى= مثل مايركد على النار شاي البنتليز
قام يزويني زمان التبجح والردى=مثل لي الغاز لاقام يزويه القفيز

تلّ قلبي تـلّ جمـسٍ تلّـه السايـق بلفّـه=يوم شاف الشوفه اللي قدم عينـه مايبيهـا
شاف دورية الحدود وموتر الشرطه بصفّـه=والحموله من شمال الحـدّ تـوّه مشتريهـا
جابها من فوق ظهر الجمس ضفّه فوق ضفّه=لا تبيّض وجه راعيها وسـم المـوت فيهـا
يوم جاهم يحترونه من ورا قفقـوف طفّـه=الرجـال اللـي مواقفهـا بلدهـا تحتميهـا
طالع الرماي يـوم إنـه طرقهافـوق كفّـه=في دواليـب الونيـت وفالمكينـه محتديهـا
وثوّر الثاني عليه وفوق شعرالـراس حفّـه=والقزازه قدم وجهه بيّـن المضـراب فيهـا
عشقه ثالث وتلـه مـع صحاصيـحٍ تنفّـه=وروح الجمس الامريكـي يـم دارٍ منتويهـا
تلّته تشبه القلبـي يـوم هاجوسـه يدفّـه=لا تذكرلـه سنيـنٍ ٍماضيـاتٍٍ مانسيـهـا
لا تذكـر مقطرالبـدوان ونشـورٍ مضـفّـه=في مرابيـعٍٍ جميلـه والخـوارج ماتجيهـا
والسوالف مع هل الطولات والجلسه برفّـه=وشربة الفنجال مـن دلـة كريـمٍ معتنيهـا
مع برازاتٍٍ ترجـح فـي لقاهـا كـل كفّـه=ولو بعد فعولهم تصعب على اللي يحتصيهـا
وكل منهم حاش فعل الطيب في صفحة ملفّه=هم عزيزين النفوس اللـي مكملهـا وليهـا
في بيوتٍٍ كنهـا شمـخ الجبـال المزلهفّـه=كل طرقـيٍٍ يبـي قولـة تفضـل يمتنيهـا
ياعسى مدهالهـم يسقيـه همّـال المرفّـه=من مزونن سيلها عالي شجرهـا تعتليهـا
تنبت الريضان عقبه والشجر تكبـر زوفّـه=والزبيدي من هطول الوسم يجنيـه ابدويهـا
ويوم صارعت الزمان اللي تروعني جنفّـه=ياهجوسي عبري لي والمشاعـر صخريهـا
وخبري عني محمد يوم شفـي مثـل شفّـه=خابرٍِ حب البـداوه وسـط قلبـه محتويهـا
يامحمد صاحبك ذاق العسـل والمـر سفّـه=ويش أسوي في عيونٍ شوفها يثـر عليهـا
ضيّقت صدري علي ودمعهـا عيّـت تكفّـه=وقلت هودي ياعيونـي والليالـي سايريهـا
وانت ماشفت الزمان اللي تروعني احوفّـه=صارت الرجلين روس ووروسها حدري يديها
يابوناصر لاتخلينـي علـى جـال المهفّـه=وانت شاعروالمراجـل خابرإنـك محتسيهـا
من صواريم الرجال اللي تفـك المستخفّـه=يوم عسـرات المواقـف فعلهايشهدعليهـا
الخوالد كـم شجـاعٍ باللقـا راسـه تزفّـه=بالسيوف اللي تبيـن فعولهافـي معتديهـا
والمجرب كل شيئ ٍ عـارفٍ ثقلـه وخفّـه=والمسافـه مايكلـف بعدهااللـي مهتويهـا
والسموحه منك والناقص من المجهود وفّـه=والإجابـه لاتوخرهاعـن اللـي يحتريـهـا

يا هلا يا مرحبا والطرق صف العقـد صفّـه=صف عقد الماس باجمل بنت مشيوفٍ عليها
فوق عاتقها تلاعج لول يـا مزيّـن اردفّـه=بنت مسطور حجرها سبع والثامـن يبيهـا
مرحبا يا شوق من مالت على الوجنه اصففّه=في كتابك والقصيـده بسـم ربـي نبتديهـا
حل في قلبي من الموضوع رجافـه وخفّـه=من قصيدة ناصر بن ضبيب يوم امعنت فيهـا
انت يوم انك توقفني علـى ميهـاف حفّـه=ناويٍ تكسب خطا نفسي تبي تقضـي عليهـا
قمت اكفكف دمع موق العين مير ازريت اكفّه=يامشاعر ناصر بن ضبيب نفسي سامحيهـا
لا تذكرت الزمان اللي على العالـم اعجفّـه=قلت يا دنياي نفسي عـن هواهـا حذّريهـا
ولو بغيت اخذ عن الطاروق سلهامه وعفّـه=اسهرتني مسألة ناصر وانـا منهـا واليهـا
رفّ قلبي للهجوس الوارده عشريـن رفّـه=واصله من واحدٍ غالـي وبالـروح افتديهـا
يا خفوقي جاك خط اغلى بشر عندك تحفّـه=يا نوادر مهجتي صوغـة صحيبـي دونيهـا
قلت اببعد به عن العالـم وبجلـس وتنفّـه=به قصيدة شاعرٍ كـل المشاعـر محتويهـا
قمت تنشدني وانا محتار في نـاس مسفّـه=يا شعور نشـدت نفـس المشاعـر بدليهـا
يضحك الجاهل على العاقل غدا عنده مخفّـه=ياهجوسي رحبي بافكـار ناصـر ونشديهـا
عن زمانٍ بلّش العربان يـا مكثـر اخلفّـه=ولا تقول الا بعض عالم عسـى الله يهديهـا
نفسك اللي كلها طيب وصخا حشمه وعفّـه=يـا لعـل الله يرحمهـا ويرحـم والديـهـا
يا سلايل من يعيش الجار والخاطـر بضّفـه=ما يوقـف واحـدٍ قدمـه حياتـه مرتجيهـا
لا اعتزا عرهان بالبلهـا وجاتـك مطلهفّـه=ما تجفل ناقته واللـي يبـي موتـه يجيهـا
يوم فاح الهيل قلت اخذ مـن الفجـال شفّـه=من دلالٍ بنها فيهـا وشفـت الهيـل فيهـا
في بيوتٍ تشبع الجيعـان والكبـد المحفّـه=اهلها ذروة بـراز اللـي تنومسهـا يديهـا
شيدوها بالسنيـن اللـي مواردهـا مجفّـه=يوم بعض الناس يعجز عيشته لا يشتريهـا
كل راعي عرف ما تجحد عبـاد الله عرفـه=من عرف فعل الحرار القاطعـه مايشتويهـا
وش اسوي في خفوقٍ ضاع يا ناصر صرفّه=امرضه بعض النفوس اللي مرضها مبتليهـا
ودك الرجال ما تكثـر بـه الدنيـا حسفّـه=العباد مسّيـره فـي حكـم عالـم معتليهـا
جاك ردا يبهـج الخفـاق يـا ناصـر تلفّـه=والمعاني خابـرك زيزومهـا وتفـوز فيهـا
وبعد ما زينتها وامست عروس بليـل زفّـه=يا صحيفـة ريـس التحريـر بالله انشريهـا
الخبير المحترف من حرفته تعـرف احرفّـه=حسب عرفي صفحت التحرير لامانع لديهـا

ابتدي بسم الله المضفي علـى خلقـه الطفّـة=ذكره البادي على من تحت الارض ومن عليها
وبعد ذكرالله من زهر الشعر نحصـد إقطفّـة=ما تحالى للعيون وشـوف عينـي يرتضيهـا
يا حواسيب الفكر هاتي لي من الشعر أعفّـه=من غزير إبحـوره إجنيلـي درره وأنظميهـا
صفّي الصافي وخلي ما تبقـى مـن عذفّـه=وفي خيالي من خيا لك ياحواسـب برمجيهـا
هاضني برقٍ تكاشف وسط غيم فـي ردفّـه=من خيال اللي بيوته من خيالـه مصطفيهـا
المهندس ناصر بن ضبيب صفّ القاف صفّـه=صفّ طابور السرية قدم مـن يامـر عليهـا
المراجل ساس طبعه والشعر يحكـم زهفّـه=من رجالٍ فعلهـا بيـض التواريـخ تحكيهـا
صوّر الماضي وصور موقفٍ وابلـغ وصفّـه=ريشـة الفنـان تعجـز بالتعابيـر اتحويهـا
من سبايب قاف ناصر جال في صدري برفّـة=قلبي اللي رفّ من بين الضلوع وجـال فيهـا
وهيّض الخاطر بذكرى ماضيٍ قفـت سوفّـه=مع قساوتها حـلات أيامهـا غطـت قسيهـا
خص وقتٍ في فياض البـر ولا فـي شعفّـه=أو تعاليلٍ عن الماضـي خفوقـي يشتهيهـا
وسط ربعٍ ما تحسّب فالزمـان وفـي كلفّـه=دون لحم وجيههـا تجـزل عطاياهـا يديهـا
تصنع المعروف والضايف تقلط لـه ضيفّـه=ولا تخيّب لو بدم الجوف هقوة مـن نصيهـا
من برازاتٍ يصيب خصومهـا منهـا مخفّـه=في نهارٍ فيه عجلات الرمـك ترمـي فليهـا
في بيـوتٍ كنهـا سـود الجبـال المقتهفّـه=نايفاتٍ في هضـابٍ مـا يضيـع منتصيهـا
يا بعد بيت السمنت ويا بعـد مظلـم غرفّـه=ياربـاعٍ فـي مجالسهـا دورسٍ نستقيـهـا
يا سلايل فارسٍ منه الرمـك تقفـي مخفّـه=وسلّة السيف المهند مـن يمينـه مرتويهـا
ترتـع البلهـا ورى سيفـه جنايبهـا منفّـه=من ذكر عرهان.. جنبهـا ولا يقـدر يجيهـا
أترك الهاجوس في مافات منه الفكـر عفّـه=لا تهيض من سلا عن ماضياتٍ قـد نسيهـا
لا تذكرنـي تـرى عينـي عبايرهـا مهفّـه=مثل قول الخالدي نفسي تبي تقضـي عليهـا
ذيك راحت مع رجـال ٍكلهـا شيمـه وعفّـه=ياعسى المعبود يرحمها ويحسن فـي ذويهـا
واقعٍ فرضه علينـا غصـب مانقـدر نكفّـه=سكةٍ مرسومـةٍ للنـاس والممشـى عليهـا

انتظرت ولاحصل منك مايثلج حشاي=رش كبدي من شهاليل ريقك رشها
ياوزين الروح كتم من الفرقا سماي=الفراق يطاول الروح لين يحشها
جيت في درب الخطيه ولا ادري وش خطاي=في رجا اللي حدرت دمعتي ما مشها
الضوامي تارد الماء وانا اقعد في ضماي=والقناه الاوليه تغير دشها
وش تبيبي فرق من مستواك لمستواي=في يدينك باقة الورد وانت تطشها
مامعاي الا اسود الفقر ميبس لي لضاي=خش نفسك عن هل الفقر الاسود خشها
طحت لك بعيال نعمه موارث هاي هاي=عقب ما انت تغشك الناس قمت تغشها
والله اني من جبا طيها طاوي رشاي=عقب شفت الورده اللي معاك تنشها
عزتي عندي لها راي والعالم براي=وانت رجلك في سنع معرفتها مشها

س/هل من كلمة اخيره؟
ج/ اشكركم مرة اخرى واعذروني على التقصير وانشاء الله سأكون معكم حينما اجد الوقت المتاح0
وفي الختام نشكر الشاعر محمد خلف الخالدي على تلبية الدعوى واعذرونا على اختصار اللقاء ولنا لقاء اخر مع شاعر اخر نتمنى ان نكون قدمنا مايرضيكم وشكراً لكم متصفحين على المتابعه00تحياتنا

اعد اللقاء: منادي
الأشراف
اللجنة الاعلاميه
((الحقوق محفوظة لمنتديات مملكة الزين))

كل الشكر للأدارة واللجنة الأعلاميه
على هذا التقديم
منادي